Kardiotokoqrafiya (KTQ) – dölün bətndaxili vəziyyətini təyin etmək üçün ən təhlükəsiz və effektli müayinə metodudur. Bu metod dölün ürək döyüntüləri tezliyinin qeydə alınması və bu tezliyin uşaqlıq əzələsinin yığılmaları, dölün hərkəti və eyni zamanda xarici qıcıqlara qarşı dəyişilməsinə əsaslanır. Müəyyən edilmişdir ki,dölün hipoksiyası zamanı ürək fəaliyyəti də dəyişilir.

Kardiotokoqrafiya vasitəsilə aşağıdakılar mümkündür:

• Hamiləlik zamanı dölün ümumi vəziyyətinə nəzarət etmək.
• Hipoksiya, fetoplasentar çatmamazlıq və s. halları vaxtında aşkar etməyə imkan verir. Dölyanı mayenin çox və ya az olması, bətndaxili infeksiyalar, hamiləliyin pozulma təhlükəsi, ciftin vaxtından qabaq yetişməsi kimi hallarda hipoksiya, fetoplasentar çatmamazlıq və s. müşahidə edilir.
• Aparılan terapiyanın effektinin qiymətləndirilməsi.
• Doğuşun gedişatını proqnozlaşdırmaq və doğuşun aparılmasında ən optimal variantı seçmək.

Hazırda bütün hamilə qadınlara üçüncü trimestrdə skrininq kardiotokoqrafiyadan keçmək məsləhət görülür. N.Tusi adına klinikada kardiotokoqrafik müayinə hamiləliyin monitorinqi paketinə daxil edilmişdir. Müayinə hamiləliyin üçüncü trimestrində bir neçə dəfə aparılır. Müayinə zamanı qadın arxası və ya yanı üstə uzanır. Qarının səthində elektrodlar və ötürücülər yerləşdirilir. Uşaqlıq əzələsinin yığılmaları, dölün ürək döyüntüləri və hərəkətləri qeydə alınır. Müayinə dölün aktiv və sakit halları nəzərə alınmaqla 40–60 dəqiqə ərzində aparılır.

Kardiotokoqrafiya dölün vəziyyətinin kompleks qiymətləndirilməsində ultrasəs müayinəsi və doppleroqrafiya ilə birlikdə mühüm rol oynayır.