PAPP-A – yüksək molekullu qlikoprotein olub, hamiləlik vaxtı trofoblast hüceyrələri tərəfindən sintez olunaraq qan dövranına daxil olur. Hamiləliyin müddəti artdıqca qanda konsentrasiyası yüksəlir.

Aparılmış tədqiqatlar nəticəsində bu zülalın hamiləliyin erkən mərhələlərində (I trimestr) döldə olan xromosom anomaliyalarının aşkar edilməsində mühüm rolu olduğu təsdiq edilmişdir. Belə ki, döldə 21-ci xromosomun trisomiyası (Daun sindromu) və ya 18-ci xromosomun trisomiyası (Edvards sindromu) zamanı ananın qanında PAPP-A-nın miqdarının azalması müşahidə olunur. Eyni zamanda bu test erkən düşüklərin və hamiləliyin erkən mərhələlərdə inkişafdan qalmasının diaqnostikasında da informativ hesab edilir. Xromosom patologiyasını aşkar etmək üçün PAPP-A-nın ayrılıqda təyin edilməsi yalnız hamiləliyin 8-9- cu həftələrində ətraflı məlumat verir. 11-14 həftəlikdə isə PAPP-A β xorion qonadotropinlə birlikdə təyin edilərsə xromosom patologiyaları haqqında daha dəqiq məlumat verə bilər. 14 həftəlikdən sonra isə bu zülalın xromosom patologiyalarını aşkar etmək üçün diaqnostik marker kimi istifadə olunma keyfiyyəti itir.

Təyin olunmuşdur ki, β xorion qonadotropin, PAPP-A və USM (boyun yaxalığının qalınlığı), yaş faktorları kombinə olunmuş şəkildə hamiləliyin ilk trimestrində Daun sindromunun prenatal skrininqinin effektivliyini xeyli artırır. Patologiya varsa 85–90% hallarda bu müayinələrin köməyi ilə aşkar edilir.

Bundan əlavə PAPP-A aşağıdakı hallarda da təyin edilir:

• Düşük təhlükəsi və ya dölün hamiləliyin erkən mərhələsində inkişafdan qalması
• Kornelii de Lanj sindromu

Hazırda N. Tusi adına Klinikanın laboratoriya şöbəsində bu müayinə çox yüksək dəqiqliklə həyata keçirilir.