Elektroensefaloqrafiya – baş beyinin summar elektrik aktivliyini qeydə almaq və qiymətləndirmək üçün ən təhlükəsiz və əlverişli müayinə üsuludur. Baş beyinin elektrik aktivliyi çox aşağı olub voltun milyonda bir hissələri ilə ölçülür, buna görə də onu qeydə almaq üçün eletroensefaloqraf adlandırılan xüsusi yüksək həssaslığa malik qurğulardan və gücləndiricilərdən istifadə olunur.

EEQ (elektroensefaloqramma) – mürəkkəb əyri olub müxtəlif tezliyə və amplituda malik dalğalardan təşkil olunmuşdur. Amplitud və tezlikdən asılı olaraq EEQ-də yunan hərfləri ilə adlandırılan alfa,beta,delta və s. dalğalar ayırd edilir.

N.Tusi adına Klinikada eletroensefaloqrafik müayinələr Telepat 104 aparatı ilə aparılır. Aparat müayinələrin nəticələrini dəqiqləşdirmək üçün xüsusi kompüter sisteminə malikdir. Kompüter elektroensefaloqrafiyasının bir sıra üstünlükləri vardır: EEQ qeydlərinin riyazi hesablanması, spektral və koqerent analiz, rəngli topoqrafik kartlaşdırılma, və s. Bu üstünlüklər beyin strukturunda olan patoloji ocaqların lokalizasiyasını dəqiqləşdirməyə imkan verir.

Müayinə aşağıdakı şəkildə aparılır:

Rezin şlemlər vasitəsilə baş nahiyəsinə kiçik elektrodlar bərkidilir. Elektrodlar ötürücülər vasitəsilə elektroensefaloqrafa birləşdilir. Elektroensefaloqraf onlardan alınmış siqnalları gücləndirərək göstəriciləri kompüterə daxil edir. Müayinə vaxtı xəstə gözləri qapalı vəziyyətdə oturur.

Epilepsiya xəstəliyinin diaqnostikası və müalicə zamanı xəstəliyin dinamikasını müşahidə etmək üçün elektroensefaloqrafiya metodunun rolu əvəzsizdir. EEQ ilk növbədə epileptik tutmanı qeyri epileptik tutmadan fərqləndirməyə və klassifikasiya etməyə imkan verir.

EEQ vasitəsilə aşağıdakılar təyin oluna bilər:

• Tutmalara səbəb olan patoloji ocaqların lokalizasiyaları
• Dərman preparatlarının qəbulundan sonra xəstəliyin dinamikası
• Dərman terapiyasına fasilə vermək, yaxud dayandırmaq
  
  
  EEQ kartlaşdırılma
  
  Normal EEQ Gicgah və təpə payında epileptik ocaq.